Bruzzle und Umecheibe

Am letschte Friitig (15. Juni 2018) isch dJungwacht und de Blauring Seewä mit em Velo zum Goldseeli gfahre. Dete hemer die beide Füürstelle i Besitz gnu und ghörig iigfüüred. Schliesslich hend üsi Würst nach dere strenge Biketour und Wanderig öpe eisch müesse dure sii. Mit vollne Büüch hend dChinde wider möge und hend dUmgebig rund ums Goldseeli uskundschaftet, gekonnt mit em Sackmesser en Chnebl gschnitzt und sich gegesiitig mit Wasser agsprützt. Alles i allem also en richtige Jungwacht und Blauring Alass.

Wills halt immer es paari gid wo nu nid ganz sicher uf de Füess stönd, heds halt zwüscheddure öpert ungwollt ufs Füdli gsetzt. Aber alles halb so schlimm. Mier hend schliesslich snüste Schmerzmittel "Placebo Glucose" (au bekannt als Truubezucker) und au hübschi Pflästerli debi gha.

Natürlich hed mer bi dem Alass au ganz villi spannendi Sache chönne lerne: Zum Biispil dass de Wurst überem Füür heiss wird und mer ne nümme sött alenge. Au dass mer nass wird wemer mit em Stock ufs Wasser schlad hed de Eint oder Ander verblüfft. Hesch du scho gwüsst dass mer dCreme muess us de Tube drücke zum Icreme anstatt die ganz Tube ufd Huut drücke? Aber au die nüüste Blondine und Fritzli Witz sind ustuscht worde.

Mitte i de Natur und wiit weg vo de Zivilisation isch scho halbe Lagerstimmig ufcho. Zum Glück gads nurnu drü Wuche bis es endlich so wiit isch. Drum: Sackmesser, Wanderschueh und Rucksack nümme zwiit versorge!

Föteli vo dem super coole Alass gfindsch under www.bilder.jwseewen.ch!

Lagercountdown