Jahresabschluss i de Badi

Ez wär das 2019 au scho fast wider verbi. Mier und sBlauring Seewe hend am 14. Dezember 2019 i de Badi üse letscht Scharalass, dWaldwiehnachte (oder Badiwiehnachte) chönne durefüehre. Bi verschiedene Pöste mit wiehnachtlichem Touch we Stafettelauf, Rätsel, Wiehnachtsgschicht mit Punsch, Lieder singe, Wiehnachtsrap und Böötli buue hend mier üsi Vorfreud ufd Wiehnachte chönne uslebe. Am Schluss hemer die bastlete Böötli mitemne Cherzli und üsne Wünsch as Christchindli uf em Lauerzersee la devo triibe. Damit wär 2019 vo üsere Siite fast abgschlosse. I de folgende Wuche findet nurnu dGruppehöck und am 24. sChinderhüete statt. Ziit zum das vergangene Jahr numal Revue passiere zlah...

 

Gstartet hed das Jahr mit em Informationsalass fürs Lager. Aber Hüür ischs nid es "normals" Lager gsi. Nei, mier sind as Kantonale Summerlager vo Jubla Uri und Schwyz zLustdorf TG gange. Zeme mit villne andere Schare hemer zwei super cooli Wuche chönne verbringe. Fründschafte sind knüpft worde und mier hend zeme de Plausch gha!

Bevor aber sKaLa gsi isch, hend mier nu es anders Highlight gha: Die füft Usgab vom Seifechiste Derby. Es isch en grossartige Event gsi wo erfolgrich über dBühni gloffe isch. dJungwacht Seewe hed sich vo sinere beste Siite chönne präsentiere.

Au am Gmeindsfäscht sind mier debi gsi. Mier hend selber dörfe es Party-Zelt stelle. A beidne Täg hend mier Full House gha und dErde hed bi fettem Bass und tanzender Menschemengi zittered.

Au das Jahr hend mier Zuewachs becho. dGruppe Skorpions isch offiziell i üsi Schar ufgnu worde. Im Summer isch üsi jüngst Gruppe Kojote gründet worde. Herzlich Willkomme! Nüi Gruppe heisst au dass es nüi Leiter geh hed. Und zwar isch die ehemalig Gruppe Haifisch is Leiterteam ufgnu worde. Vo es paar Leiter hemer üs müesse verabschide. Danke für üche langjährige Isatz und vill Spass im Ehemaligeverein!

 

2020 wird vergliche zum 19i eher es ruhigers Jahr. Das heisst aber nid dass es langwilig wird. Planig fürs Summerlager hed scho gstartet und de erst Scharalass findet mit de Aktion 72 Stund scho im Januar statt.

 

sLeiterteam vo de Jungwacht Seewe bedankt sich bi allne Eltere, Chinde, Sponsore, Ehemalige und allne andere Jungwacht Seewe Fans für die grandios Unterstützig und üches Vertrue. Mier wünsched allne schöni Wiehnachte und en guete Rutsch is 2020!