Ab uf'd Allmend! D'Jungwacht am Jublaversum

D Vorfreud isch nid uszhalte gsi. Alli sind ufgregt gsi womer üs äntlich versammelt hend, zum uf Bern z’fahre. Das chund sicher guet. Landeier wie mier ide Hauptstadt.

Fritig Abig. Abgfahre um siebni oder so… Acho fast nach de Nachtrueh. Aber s grösste Highlight vom Tag isch natürlich no vor üs gstande: Zähndputze. Jeh!.. Naja isch au wieder mal Ziit worde sidem Lager. Es git Lüt wo bhauptet das sich nid alli Jungwächtler ad Nachtrueh ghalte hend. Aber das halt ich für es Grücht.

Guet usgschlafe sind am nächste Morge alli topfit gsi und nachem sehr riichhaltige Morgesse *hust hust* hemmer a verschiednige Ateliers teilneh chönne. Sofort sind die erste uf de Suechi nachem Yogazelt gsi. Blöd nume das de Poste erst später ufgmacht het. Aber das het üs nid zruggghalte überall mal inezluege. D Uswahl isch riiiesig gsi. Seifetschute, Menschetöggelichastetschute, Torwandtschute (hai hets viel zum tschute gha) Absolutes Dauerbrenner sind allerdings Kubb und Werwölfle gsi. Und so isch de Samstig gschwind verbi gange.

Gege Abi isch nomal en Bigpoint gsi. 10‘000 Chind uf eim Platz. Und damit mer es nid wiit hend zum go schlafe gah, simmer natürlich fast z’hinderst gsi. Das isch de Grund und sicher nid will mer spat dra gsi sind. Nachem Bigpoint isch den au scho d Nachtrueh gsi und dasmal hend wirkli fast alli gschlafe. Isch öppe astrengend gsi!

Am Sunntig simmer no ide Postfinance Arena zum Schlusspunk. Später simmer wieder müed aber mit vielne schöne Erlebniss und nüe Bekantschafte nach Seewe zruggfahre. Man munkelt, öpper het e Abkürzig gno.

 

Bilder zu dem super Alass findisch du da!